ਭਾਖੜਾ ’ਚ ਕਾਰ ਡਿੱਗਣ ਨਾਲ ਘਰ ਦਾ ਇਕਲੌਤਾ ਚਿਰਾਗ ਬੁਝਿਆ, ਲਹਿਰੇ ਤੋਂ ਨਿੱਜੀ ਕੰਮ ਲਈ ਦਾ ਰਿਹਾ ਸੀ ਟੋਹਾਣੇ

07/04/2024

ਸਥਾਨਕ ਸ਼ਹਿਰ ਦੇ ਇੱਕ ਨੌਜਵਾਨ ਦੀ ਟੋਹਾਣਾ ਨੇੜੇ ਭਾਖੜਾ ਨਹਿਰ ਵਿੱਚ ਹੌਂਡਾ ਸਿਟੀ ਕਾਰ ਡਿੱਗਣ ਨਾਲ ਮਾਪਿਆਂ ਦੇ ਇਕਲੌਤੇ ਪੁੱਤਰ ਮੌਤ ਹੋ ਗਈ। ਜਾਣਕਾਰੀ ਅਨੁਸਾਰ ਸਥਾਨਕ ਸ਼ਹਿਰ ਦਾ 28 ਸਾਲਾ ਗਗਨਦੀਪ ਸਿੰਘ ਪੁੱਤਰ ਹਰਬੰਸ ਸਿੰਘ ਵਾਰਡ ਨੰਬਰ ਚਾਰ ਜੋ ਟੋਹਾਣਾ ਵਿਖੇ ਨਿੱਜੀ ਕੰਮ ਕਾਰ ਲਈ ਜਾਂਦਾ ਆਉਂਦਾ ਰਹਿੰਦਾ ਸੀ।

ਮਿਲੀ ਜਾਣਕਾਰੀ ਅਨੁਸਾਰ ਟੋਹਾਣਾ ਦੇ ਦਮਕੌਰਾ ਰੋਡ ’ਤੇ ਕੁਝ ਲੋਕਾਂ ਨੇ ਭਾਖੜਾ ਨਹਿਰ ਵਿੱਚ ਇੱਕ ਹੌਂਡਾ ਸਿਟੀ ਕਾਰ ਡਿੱਗੀ ਦੇਖੀ ਜਿਸ ਦੀ ਸੂਚਨਾ ਪੁਲਿਸ ਨੂੰ ਦਿੱਤੀ ਗਈ। ਥਾਣਾ ਟੋਹਾਣਾ ਦੀ ਪੁਲਿਸ ਨੇ ਕਾਰ ਨੂੰ ਜੇਬੀਸੀ ਰਾਹੀਂ ਭਾਖੜਾ ਨਹਿਰ ਵਿੱਚੋਂ ਬਾਹਰ ਕੱਢਿਆ ਤਾਂ ਉਸ ਵਿੱਚ ਕੋਈ ਵਿਅਕਤੀ ਨਹੀਂ ਸੀ ਪਰ ਬੜੀ ਮੁਸ਼ੱਕਤ ਨਾਲ ਗੋਤਾ ਖੋਰਾਂ ਨੇ ਕਾਰ ਡਿੱਗਣ ਵਾਲੀ ਥਾਂ ਤੋਂ ਮਹਿਜ਼ ਪੰਜਾਹ ਮੀਟਰ ਦੂਰੀ ’ਤੇ ਚਾਲਕ ਦੀ ਲਾਸ਼ ਬਰਾਮਦ ਕੀਤੀ। ਮਿਲੇ ਆਈ ਕਾਰਡ ਮੁਤਾਬਕ ਮ੍ਰਿਤਕ ਦੀ ਪਛਾਣ ਗਗਨਦੀਪ ਸਿੰਘ ਵਜੋਂ ਹੋਈ। ਥਾਣਾ ਟੋਹਾਣਾ (ਹਰਿਆਣਾ) ਜ਼ਿਲਾ ਫਤਿਹਾਬਾਦ ਦੀ ਪੁਲਿਸ ਦੇ ਦੱਸਣ ਮੁਤਾਬਕ ਮ੍ਰਿਤਕ ਗਗਨਦੀਪ ਸਿੰਘ ਦਾ ਪੋਸਟਮਾਰਟਮ ਟੋਹਾਣਾ ਤੋਂ ਕਰਵਾ ਕੇ ਲਾਸ਼ ਵਾਰਸਾਂ ਨੂੰ ਸੌਂਪ ਦਿੱਤੀ ਜਾਵੇਗੀ।