ਮਾਂ ਕਰ ਰਹੀ ਸੀ ਰੋਟੀ ਲਈ ਉਡੀਕ, ਪਲਾਸਟਿਕ ਡੋਰ ਨੇ ਖੋਹ ਲਿਆ ਜਿਗਰ ਦਾ ਟੁਕੜਾ

16/02/2024

ਛੇਵੀਂ ਜਮਾਤ ’ਚ ਪੜ੍ਹਦਾ ਜੈਵੀਰ ਸਿੰਘ ਆਪਣੀ ਮਾਂ ਨੂੰ ਇਹ ਕਹਿ ਕੇ ਘਰੋਂ ਗਿਆ ਸੀ ਕਿ ਉਹ ਵਾਪਸ ਆਉਣ ’ਤੇ ਰੋਟੀ ਖਾਵੇਗਾ, ਰੋਟੀ ਬਣਾ ਕੇ ਰੱਖੋ। ਮਾਂ ਜਿਗਰ ਦੇ ਟੁਕੜੇ ਦਾ ਇੰਤਜ਼ਾਰ ਕਰਦੀ ਰਹੀ, ਪਰ ਪਲਾਸਟਿਕ ਡੋਰ ਨੇ ਇਸ ਇੰਤਜ਼ਾਰ ਨੂੰ ਇੰਨਾ ਲੰਮਾ ਕਰ ਦਿੱਤਾ ਕਿ ਇਹ ਉਮਰ ਭਰ ਖ਼ਤਮ ਨਹੀਂ ਹੋਵੇਗਾ। ਕੁਝ ਰੁਪਏ ਦੇ ਲਾਲਚ ਲਈ ਕੁਝ ਲੋਕ ਮੌਤ ਨੂੰ ਵੇਚ ਰਹੇ ਹਨ, ਜਿਸ ਕਾਰਨ ਕਈ ਘਰਾਂ ਦੇ ਚਿਰਾਗ ਬੁਝ ਚੁੱਕੇ ਹਨ। ਪੁਲਿਸ ਤੇ ਪ੍ਰਸ਼ਾਸਨ ਦੇ ਮਾੜੇ ਰਵੱਈਏ ਕਾਰਨ ਜਲੰਧਰ ’ਚ ਸ਼ਰੇਆਮ ਚਾਈਨਾ ਡੋਰ ਵਿਕ ਰਹੀ ਹੈ। ਆਦਮਪੁਰ ’ਚ ਛੇਵੀਂ ਜਮਾਤ ਦੇ 14 ਸਾਲਾ ਵਿਦਿਆਰਥੀ ਦੀ ਮੌਤ ਤੋਂ ਬਾਅਦ ਕਸਬੇ ਦੇ ਲੋਕ ਵੀ ਸਦਮੇ ’ਚ ਹਨ। ਪਰਿਵਾਰ ’ਚ ਸਭ ਤੋਂ ਛੋਟਾ ਹੋਣ ਕਰਕੇ ਜੈਵੀਰ ਸਿੰਘ ਸਾਰਿਆਂ ਦਾ ਲਾਡਲਾ ਸੀ। ਇਲਾਕੇ ਦੇ ਲੋਕ ਵੀ ਉਸ ਨੂੰ ਬਹੁਤ ਪਿਆਰ ਕਰਦੇ ਸਨ। ਉਸ ਨੇ ਕਦੇ ਕਿਸੇ ਨੂੰ ਕੰਮ ਲਈ ਨਾਂਹ ਨਹੀਂ ਕੀਤੀ ਸੀ। ਉਹ ਹਮੇਸ਼ਾ ਸਾਰਿਆਂ ਨਾਲ ਮੁਸਕਰਾ ਕੇ ਗੱਲ ਕਰਦਾ ਸੀ। ਅਜੀਤ ਨਗਰ ਦੇ ਰਹਿਣ ਵਾਲੇ ਗਗਨਦੀਪ ਤੇ ਰਵੀਪਾਲ ਨੇ ਦੱਸਿਆ ਕਿ ਜੈਵੀਰ ਤੇ ਉਸ ਦਾ ਵੱਡਾ ਭਰਾ ਹਰਜੋਤ ਦੋਵੇਂ ਮਿਲਣਸਾਰ ਸੁਭਾਅ ਦੇ ਹਨ। ਜੇ ਜੈਵੀਰ ਨੂੰ ਕੋਈ ਕੰਮ ਕਰਨ ਲਈ ਕਿਹਾ ਜਾਂਦਾ ਤਾਂ ਉਹ ਕਰਦਾ ਤੇ ਕਦੇ ਨਾਂ ਨਹੀਂ ਕਰਦਾ ਸੀ। ਉਹ ਪੜ੍ਹਾਈ ’ਚ ਵੀ ਬਹੁਤ ਹੁਸ਼ਿਆਰ ਸੀ। ਇਸ ਦਰਦਨਾਕ ਹਾਦਸੇ ’ਚ ਉਸ ਦੀ ਮੌਤ ਨਾਲ ਇਲਾਕੇ ਦੇ ਲੋਕ ਵੀ ਦੁਖੀ ਹਨ। ਪੁੱਤਰ ਦੀ ਮੌਤ ਦੀ ਖ਼ਬਰ ਸੁਣ ਕੇ ਉਸ ਦੀ ਮਾਂ ਸੋਨੀਆ ਦੇ ਹੰਝੂ ਨਹੀਂ ਰੁਕ ਰਹੇ। ਉਹ ਆਪਣੇ ਪੁੱਤਰ ਨੂੰ ਮਿਲਣ ਲਈ ਵਾਰ-ਵਾਰ ਵਿਲਕ ਰਹੀ ਹੈ ਤੇ ਕੋਈ ਵੀ ਉਸ ਨੂੰ ਇਹ ਸਮਝਾਉਣ ਦੇ ਯੋਗ ਨਹੀਂ ਸੀ ਕਿ ਉਸ ਦਾ ਪੁੱਤਰ ਆਪਣੀ ਮਾਂ ਨੂੰ ਦੁਬਾਰਾ ਕਦੇ ਨਹੀਂ ਮਿਲ ਸਕਦਾ। ਕੁਝ ਘੰਟੇ ਪਹਿਲਾਂ ਜਿਸ ਪਰਿਵਾਰ ’ਚ ਖ਼ੁਸ਼ੀਆਂ ਸੀ, ਉੱਥੇ ਹੁਣ ਮਾਤਮ ਛਾਇਆ ਹੋਇਆ ਹੈ। ਰੋਣ ਕਾਰਨ ਵੱਡੇ ਭਰਾ ਹਰਜੋਤ ਦਾ ਵੀ ਬੁਰਾ ਹਾਲ ਸੀ। ਜੈਵੀਰ ਦੇ ਪਿਤਾ ਜਤਿੰਦਰ ਸਿੰਘ ਜੋ ਕਿ ਮਕੈਨੀਕਲ ਇੰਜੀਨੀਅਰ ਹਨ, ਆਪਣੇ ਪੁੱਤਰ ਦੀ ਲਾਸ਼ ਦੇਖ ਕੇ ਦੁਖੀ ਹਨ ਤੇ ਉਨ੍ਹਾਂ ਨੂੰ ਸੰਭਾਲਣਾ ਮੁਸ਼ਕਲ ਹੋ ਰਿਹਾ ਹੈ।

ਬਾਜ਼ਾਰ ’ਚ ਸ਼ਰੇਆਮ ਵਿੱਕ ਰਹੀ ਪਲਾਸਟਿਕ ਡੋਰ, ਪੁਲਿਸ ਨਹੀਂ ਕਰਦੀ ਕਾਰਵਾਈ

ਆਦਮਪੁਰ ਸ਼ਹਿਰ ’ਚ ਪਲਾਸਟਿਕ ਡੋਰ ਸ਼ਰੇਆਮ ਵਿਕਦੀ ਹੈ। ਕੁਝ ਦੁਕਾਨਾਂ ਅਜਿਹੀਆਂ ਹਨ ਜਿੱਥੋਂ ਕੋਈ ਵੀ ਜਾ ਕੇ ਪਲਾਸਟਿਕ ਡੋਰ ਖ਼ਰੀਦ ਸਕਦਾ ਹੈ। ਪਾਬੰਦੀ ਦੇ ਬਾਵਜੂਦ ਸ਼ਹਿਰ ’ਚ ਸ਼ਰੇਆਮ ਨਿਯਮਾਂ ਦੀਆਂ ਧੱਜੀਆਂ ਉਡਾਈਆਂ ਜਾ ਰਹੀਆਂ ਹਨ, ਪਰ ਪੁਲਿਸ ਪ੍ਰਸ਼ਾਸਨ ਚੁੱਪੀ ਧਾਰੀ ਬੈਠਾ ਹੈ। ਇਸ ਸਾਲ ਬਸੰਤ ਵੀ ਬੀਤ ਗਈ ਹੈ, ਪਰ ਪੁਲਿਸ ਨੇ ਅਜੇ ਤੱਕ ਕਸਬੇ ’ਚ ਕੋਈ ਠੋਸ ਕਾਰਵਾਈ ਨਹੀਂ ਕੀਤੀ। ਇਸ ਦਾ ਨਤੀਜਾ ਹੈ ਕਿ ਕੁਝ ਦੁਕਾਨਦਾਰ ਨਿਡਰ ਹੋ ਕੇ ਲੋਕਾਂ ਦੀਆਂ ਜਾਨਾਂ ਨਾਲ ਖੇਡ ਰਹੇ ਹਨ। ਸਮਾਜ ਸੇਵੀ ਗੁਰਮੁਖ ਸਿੰਘ ਸੂਰੀ ਦਾ ਕਹਿਣਾ ਹੈ ਕਿ ਇਹ ਬਹੁਤ ਗੰਭੀਰ ਮਾਮਲਾ ਹੈ। ਪਲਾਸਟਿਕ ਡੋਰ ਕਾਰਨ ਇਕ ਮਾਸੂਮ ਬੱਚੇ ਦੀ ਜਾਨ ਚਲੀ ਗਈ। ਉਸ ਨੇ ਅਜੇ ਦੁਨੀਆਂ ਨੂੰ ਚੰਗੀ ਤਰ੍ਹਾਂ ਨਹੀਂ ਦੇਖਿਆ ਸੀ। ਪੁਲਿਸ ਤੇ ਪ੍ਰਸ਼ਾਸਨ ਨੂੰ ਜਾਗਣ ਦੀ ਲੋੜ ਹੈ। ਇਸ ਦੇ ਨਾਲ ਹੀ ਮਾਪਿਆਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਬੱਚਿਆਂ ਨੂੰ ਜਾਗਰੂਕ ਕਰਨ ਕਿ ਉਹ ਕਦੇ ਵੀ ਪਲਾਸਟਿਕ ਡੋਰ ਦੀ ਵਰਤੋਂ ਨਾ ਕਰਨ।

ਨਾਨਾ-ਦੋਹਤੀ ਵੀ ਹੋਏ ਸਨ ਚਾਈਨਾ ਡੋਰ ਦੇ ਸ਼ਿਕਾਰ

ਬੁੱਧਵਾਰ ਨੂੰ ਫਿਲੌਰ ’ਚ ਵੀ ਨਾਨਾ ਤੇ ਦੋਹਤੀ ਵੀ ਪਲਾਸਟਿਕ ਡੋਰ ਦਾ ਸ਼ਿਕਾਰ ਹੋ ਗਏ ਤੇ ਬੀਤੇ ਦਿਨੀਂ ਆਪਣੇ ਰਿਸ਼ਤੇਦਾਰਾਂ ਨਾਲ ਐਕਟਿਵਾ ’ਤੇ ਰਾਮਾ ਮੰਡੀ ਤੋਂ ਨਿਕਲ ਰਹੀ ਨੰਗਲ ਕਰਾਰ ਖਾਂ ਦੀ ਰਹਿਣ ਵਾਲੀ ਅੰਜਲੀ ਪਾਲ ਪਲਾਸਟਿਕ ਡੋਰ ਦੀ ਲਪੇਟ ’ਚ ਆ ਗਈ ਤੇ ਉਸ ਦਾ ਗਲਾ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਿਆ। ਉਸ ਨੇ ਆਪਣੇ ਹੱਥ ਨਾਲ ਡੋਰ ਹਟਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਇਸ ਦੇ ਹੱਥ ਦੀਆਂ ਦੋ ਉਂਗਲਾਂ ਕੱਟੀਆ ਗਈਆਂ। ਉਂਗਲੀਆਂ ’ਤੇ ਚਾਰ ਟਾਂਕੇ ਤੇ ਗਲੇ ’ਤੇ ਤਿੰਨ ਟਾਂਕੇ ਲੱਗੇ। ਖੁਸ਼ਕਿਸਮਤੀ ਰਹੀ ਕਿ ਉਸ ਦੀ ਜਾਨ ਬਚ ਗਈ।

ਪਲਾਸਟਿਕ ਡੋਰ ਨਾਲ ਜ਼ਖ਼ਮੀ ਹੋਣ ’ਤੇ ਜਾ ਸਕਦੇ ਹੋ ਅਦਾਲਤ

ਐਡਵੋਕੇਟ ਵਿਨੇ ਸ਼ਰਮਾ ਦਾ ਕਹਿਣਾ ਹੈ ਕਿ ਜੇਕਰ ਕੋਈ ਪਲਾਸਟਿਕ ਡੋਰ ਨਾਲ ਜ਼ਖ਼ਮੀ ਹੁੰਦਾ ਹੈ, ਤਾਂ ਉਹ ਅਦਾਲਤ ਦਾ ਦਰਵਾਜ਼ਾ ਖੜਕਾ ਸਕਦਾ ਹੈ। ਜਿਸ ਚੀਜ਼ ਨਾਲ ਕਿਸੇ ਦੀ ਜਾਨ ਜਾ ਸਕਦੀ ਹੈ ਤਾਂ ਉਸ ਚੀਜ਼ ਨੂੰ ਰੱਖਦਾ, ਵੇਚਣ ਵਾਲਾ ਜਾਂ ਵਰਤਣ ਵਾਲੇ ’ਤੇ ਕਤਲ ਦੀ ਕੋਸ਼ਿਸ਼ ਦਾ ਮਾਮਲਾ ਦਰਜ ਹੋ ਸਕਦਾ ਹੈ। ਕਾਨੂੰਨ ਇਹ ਵੀ ਮੰਨਦਾ ਹੈ ਕਿ ਪਲਾਸਟਿਕ ਡੋਰ ਜਾਨਲੇਵਾ ਹਨ। ਪਲਾਸਟਿਕ ਡੋਰ ਨਾਲ ਵਾਤਾਵਰਨ ਨੂੰ ਨੁਕਸਾਨ ਹੁੰਦਾ ਹੈ, ਜਾਨਵਰਾਂ ਤੇ ਪੰਛੀਆਂ ਨੂੰ ਨੁਕਸਾਨ ਹੁੰਦਾ ਹੈ ਤੇ ਜਾਨ ਵੀ ਜਾ ਸਕਦੀ ਹੈ। ਜੇਕਰ ਇਸ ਕਾਰਨ ਕਿਸੇ ਦੀ ਮੌਤ ਹੋ ਜਾਂਦੀ ਹੈ ਤਾਂ ਪੀੜਤ ਪਰਿਵਾਰ ਦੇ ਬਿਆਨਾਂ ਦੇ ਆਧਾਰ ’ਤੇ ਕਤਲ ਦਾ ਮਾਮਲਾ ਦਰਜ ਹੋ ਜਾ ਸਕਦਾ ਹੈ।

ਚਾਈਨਾ ਡੋਰ ਵੇਚਣ ਵਾਲਿਆਂ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਂਦੀ ਹੈ। ਜੇਕਰ ਬੱਚੇ ਦੇ ਪਰਿਵਾਰ ਵਾਲੇ ਕਿਸੇ ਖ਼ਿਲਾਫ਼ ਕੋਈ ਕਾਰਵਾਈ ਕਰਨਾ ਚਾਹੁੰਦੇ ਹਨ ਤਾਂ ਪੁਲਿਸ ਹਰ ਤਰ੍ਹਾਂ ਦੀ ਕਾਰਵਾਈ ਕਰਨ ਲਈ ਤਿਆਰ ਹੈ। ਪਲਾਸਟਿਕ ਡੋਰ ਵੇਚਣਾ ਕਾਨੂੰਨੀ ਜੁਰਮ ਹੈ ਤੇ ਇਸ ਲਈ ਸਖ਼ਤ ਨਿਯਮ ਹਨ। ਆਉਣ ਵਾਲੇ ਦਿਨਾਂ ’ਚ ਪਲਾਸਟਿਕ ਡੋਰ ਰੱਖਣ ਜਾਂ ਵਰਤਣ ਵਾਲਿਆਂ ’ਤੇ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ, ਜਲਦ ਹੀ ਇਸ ਸਬੰਧੀ ਮੁਹਿੰਮ ਚਲਾਈ ਜਾਵੇਗੀ ਤੇ ਇਸ ਨੂੰ ਵੇਚਣ ਵਾਲਿਆਂ ’ਤੇ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।

ਐੱਸਐੱਸਪੀ ਮੁੱਖਵਿੰਦਰ ਸਿੰਘ ਭੁੱਲਰ

ਵੱਡਾ ਸਵਾਲ

ਜੈਵੀਰ ਦੀ ਮੌਤ ਦਾ ਜ਼ਿੰਮੇਵਾਰ ਕੌਣ? ਪਲਾਸਟਿਕ ਡੋਰ ਜਾਂ ਪੁਲਿਸ ਤੇ ਪ੍ਰਸ਼ਾਸਨ ਦੀ ਨਾਕਾਮੀ

ਪਲਾਸਟਿਕ ਡੋਰ ਨਾਲ ਗਲਾ ਵੱਢਣ ਕਾਰਨ ਵਿਦਿਆਰਥੀ ਜੈਵੀਰ ਦੀ ਮੌਤ ਤੋਂ ਬਾਅਦ ਸਵਾਲ ਇਹ ਉੱਠਦਾ ਹੈ ਕਿ 14 ਸਾਲ ਦੀ ਉਮਰ ’ਚ ਉਸ ਦੀ ਮੌਤ ਦਾ ਜ਼ਿੰਮੇਵਾਰ ਕੌਣ ਹੈ? ਕੀ ਮਾਸੂਮ ਬੱਚੇ ਦੀ ਮੌਤ ਲਈ ਸਿਰਫ਼ ਪਲਾਸਟਿਕ ਡੋਰ ਜ਼ਿੰਮੇਵਾਰ ਹੈ ਜਾਂ ਇਹ ਵੀ ਪੁਲਿਸ ਤੇ ਪ੍ਰਸ਼ਾਸਨ ਦੀ ਨਾਕਾਮੀ ਹੈ? ਬਿਨਾਂ ਠੋਸ ਕਾਰਵਾਈ ਕੀਤੇ ਸ਼ਹਿਰਾਂ ਤੇ ਕਸਬਿਆਂ ’ਚ ਪਲਾਸਟਿਕ ਡੋਰ ਅੰਨ੍ਹੇਵਾਹ ਵੇਚੀ ਜਾ ਰਹੀ ਹੈ। ਪੁਲਿਸ ਖਾਨਾਪੂਰਤੀ ਲਈ ਪਲਾਸਟਿਕ ਡੋਰ ਜ਼ਬਤ ਕਰ ਲੈਂਦੀ ਹੈ ਤੇ ਇਹ ਦਰਸਾਉਂਦੀ ਹੈ ਕਿ ਕਾਰਵਾਈ ਕੀਤੀ ਜਾ ਰਹੀ ਹੈ, ਪਰ ਅੱਜ ਤੱਕ ਪਲਾਸਟਿਕ ਡੋਰ ਬਣਾਉਣ ਵਾਲੇ, ਵੇਚਣ ਵਾਲਿਆਂ ਤੇ ਵਰਤਣ ਵਾਲਿਆਂ ਵਿਰੁੱਧ ਕੋਈ ਠੋਸ ਕਾਰਵਾਈ ਨਹੀਂ ਕੀਤੀ ਗਈ। ਧਾਰਾ 188 ਤਹਿਤ ਕੇਸ ਦਰਜ ਕਰ ਕੇ ਜਾਨਲੇਵਾ ਡੋਰ ਨੂੰ ਵੇਚਣ ਵਾਲੇ ਤੇ ਵਰਤਣ ਵਾਲੇ ਆਸਾਨੀ ਨਾਲ ਜ਼ਮਾਨਤ ਦੇ ਕੇ ਬੱਚ ਜਾਂਦੇ ਹਨ। ਅਜਿਹੇ ਲੋਕਾਂ ਖ਼ਿਲਾਫ਼ ਵਾਤਾਵਰਨ ਸੁਰੱਖਿਆ ਐਕਟ ਦੀ ਧਾਰਾ 15 ਤਹਿਤ ਕੇਸ ਦਰਜ ਕਿਉਂ ਨਹੀਂ ਕੀਤਾ ਜਾਂਦਾ, ਜਿਸ ’ਚ ਪੰਜ ਸਾਲ ਦੀ ਕੈਦ ਤੇ ਇਕ ਲੱਖ ਰੁਪਏ ਤੱਕ ਦੇ ਜੁਰਮਾਨੇ ਦੀ ਵਿਵਸਥਾ ਹੈ। ਇਸ ਮਾਮਲੇ ’ਚ ਪੁਲਿਸ ਤੇ ਪ੍ਰਸ਼ਾਸਨ ਦੀ ਕਾਰਵਾਈ ’ਤੇ ਵੱਡਾ ਸਵਾਲ ਉੱਠਦਾ ਹੈ।

ਪਲਾਸਟਿਕ ਡੋਰ ਦੀ ਪਛਾਣ

- ਇਸ ਦਾ ਧਾਗਾ ਰੇਸ਼ਮ ਦਾ ਹੁੰਦਾ ਹੈ।

- ਧਾਗੇ ’ਤੇ ਕੱਚ ਦਾ ਪਾਉਡਰ ਇਸ ਨੂੰ ਚਮਕਦਾਰ ਬਣਾਉਂਦਾ ਹੈ।

- ਪਲਾਸਟਿਕ ਡੋਰ ਦਾ ਧਾਗਾ ਟੁੱਟਦਾ ਨਹੀਂ, ਬਲਕਿ ਖਿੱਚਦਾ ਹੈ।

ਮਾਪਿਆਂ ਨੂੰ ਬੱਚਿਆਂ ਨੂੰ ਸਮਝਾਉਣਾ ਚਾਹੀਦਾ ਹੈ:

- ਪਲਾਸਟਿਕ ਡੋਰ ਜਾਨਲੇਵਾ ਹੁੰਦੀ ਹੈ। ਇਸ ਨਾਲ ਡੂੰਘੇ ਜ਼ਖ਼ਮ ਹੋ ਜਾਂਦੇ ਹਨ। ਇਸ ’ਚ ਕਰੰਟ ਵੀ ਆਉਂਦਾ ਹੈ।

- ਬੱਚਿਆਂ ਨੂੰ ਸਮਝਾਓ ਕਿ ਸਾਧਾਰਨ ਧਾਗੇ ਦਾ ਬਣਿਆ ਮਾਂਜਾ ਖ਼ਤਰਨਾਕ ਨਹੀਂ ਹੈ। ਜੇਕਰ ਕੋਈ ਇਸ ’ਚ ਫਸ ਜਾਂਦਾ ਹੈ ਤਾਂ ਉਹ ਜ਼ਖਮੀ ਨਹੀਂ ਹੁੰਦਾ।

- ਬੱਚਿਆਂ ਨੂੰ ਆਪਣੀ ਮੌਜੂਦਗੀ ’ਚ ਹੀ ਪਤੰਗ ਉਡਾਉਣ ਦਿਓ। ਧਿਆਨ ਰੱਖੋ ਕਿ ਉਹ ਕਿਹੜੀ ਡੋਰ ਵਰਤ ਰਿਹਾ ਹੈ।

- ਜੇਕਰ ਬੱਚੇ ਨੇ ਪਤੰਗ ਉਡਾਉਣ ਲਈ ਬਜ਼ਾਰ ਤੋਂ ਕੋਈ ਡੋਰ ਖਰੀਦੀ ਹੈ, ਤਾਂ ਪਹਿਲਾਂ ਤੁਸੀਂ ਖੁਦ ਦੇਖੋ ਕਿ ਇਹ ਕਿਹੜੀ ਡੋਰ ਹੈ।