ਬੈਟਰੀਆਂ ਵਾਲਾ ਦੁਕਾਨਦਾਰ ਆਨਲਾਈਨ ਠੱਗੀ ਦਾ ਸ਼ਿਕਾਰ

13/07/2025

ਚੰਡੀਗੜ੍ਹ ਰੋਡ ਉਪਰ ਬੈਟਰੀਆਂ ਦੀ ਦੁਕਾਨ ਕਰਦੇ ਕਮਲ ਨਾਮੀ ਨੌਜਵਾਨ ਨਾਲ ਇਕ ਅਖੌਤੀ ਆਰਮੀਮੈਨ ਠੱਗ ਨੇ 23ਹਜ਼ਾਰ 4 ਸੌ ਰੁਪਏ ਦੀ ਠੱਗੀ ਮਾਰ ਲਈ ਹੈ। ਜਾਣਕਾਰੀ ਦਿੰਦਿਆਂ ਦੁਕਾਨਦਾਰ ਕਮਲ ਸਿੰਘ ਨੇ ਦੱਸਿਆ ਕਿ ਉਸਨੂੰ ਇਕ ਫੋਨ ਆਇਆ । ਫੋਨ ਕਰਤਾ ਨੇ ਦੱਸਿਆ ਕਿ ਉਹ ਇਕ ਆਰਮੀਮੈਨ ਹੈ ਅਤੇ ਉਸਦੀ ਗੱਡੀ ਦੀ ਬੈਟਰੀ ਖਰਾਬ ਹੋ ਚੁੱਕੀ ਹੈ।

ਬੈਟਰੀ ਦਾ ਰੇਟ 56 ਸੌ ਰੁਪਏ ਵਿਚ ਤੈਅ ਹੋ ਗਿਆ। ਫੋਨ ਕਰਨਵਾਲੇ ਨੇ ਪਹਿਲਾਂ 3 ਹਜ਼ਾਰ ਰੁਪਏ ਦੁਕਾਨਦਾਰ ਦੇ ਅਕਾਊਂਟ ਵਿਚ ਪਾ ਦਿੱਤੇ ਅਤੇ ਉਸਦਾ ਬੈਂਕ ਮੈਸੇਜ ਪਰੂਫ਼ ਵੱਜੋਂ ਦੁਕਾਨਦਾਰ ਦੇ ਵਟਸਐੱਪ ‘ਤੇ ਭੇਜ ਦਿੱਤਾ ਗਿਆ ਉਸਤੋਂ ਬਾਅਦ ਉਸ ਵਟਸਐੱਪ ਨੰਬਰ ਉਪਰ 26 ਹਜ਼ਾਰ ਰੁਪਏ ਟ੍ਰਾਂਸਫਰ ਹੋਣ ਦਾ ਮੈਸੇਜ ਵੀ ਆ ਗਿਆ।

ਇਸਦੇ ਨਾਲ ਹੀ ਠੱਗ ਵਿਅਕਤੀ ਵੱਲੋਂ ਫੋਨ ਕਰਕੇ ਕਿਹਾ ਗਿਆ ਕਿ ਉਸਨੇ 26 ਸੌ ਰੁਪਏ ਪਾਉਣ ਦੀ ਥਾਂ ਗਲਤੀ ਨਾਲ 26 ਹਜ਼ਾਰ ਅਕਾਊਂਟ ਵਿਚ ਪਾ ਦਿੱਤੇ। ਦੁਕਾਨਦਾਰ ਉਕਤ ਠੱਗ ਦੇ ਝਾਂਸੇ ਵਿਚ ਆ ਗਿਆ ਅਤੇ ਉਸਨੇ 23ਹਜ਼ਾਰ 4 ਸੌ ਰੁਪਏ ਬਿਨ੍ਹਾਂ ਸੋਚੇਸਮਝੇ ਠੱਗ ਦੇ ਅਕਾਊਂਟ ਵਿਚ ਪਾ ਦਿੱਤੇ। ਇਸ ਦੌਰਾਨ ਠੱਗ ਆਪਣੀ ਠੱਗੀ ਲਗਾਉਣ ਵਿਚ ਕਾਮਯਾਬ ਹੋ ਗਿਆ।

ਦੂਸਰੀ ਘਟਨਾ ਵਿੱਚ ਇਨ੍ਹਾਂ ਠੱਗਾਂ ਵੱਲੋਂ ਬੜੀ ਹੀ ਚੁਸਤੀ ਨਾਲ ਨੌਸਰਬਾਜ਼ੀ ਕਰਦੇ ਹੋਏ ਲੋਕਾਂ ਨੂੰ ਆਪਣਾ ਸ਼ਿਕਾਰ ਬਣਾਇਆ ਜਾ ਰਿਹਾ ਹੈ। ਜਾਣਕਾਰੀ ਅਨੁਸਾਰ ਨੌਸਰਬਾਜ਼ਾਂ ਵੱਲੋਂ ਸ਼ਹਿਰ ਦੇ ਦੁਕਾਨਾਦਾਰਾਂ ਨੂੰ ਆਪਣੇ ਟਾਰਗੇਟ ‘ਤੇ ਰੱਖਦੇ ਹੋਏ ਉਨ੍ਹਾਂ ਨੂੰ ਠੱਗੀ ਦਾ ਸ਼ਿਕਾਰ ਬਣਾਇਆ ਜਾ ਰਿਹਾ ਹੈ। ਅੱਜ ਵਾਪਰੀ ਇਕ ਘਟਨਾਂ ਵਿਚ ਸ਼ਹਿਰ ਵਿਚ ਸ਼ਟੇਸ਼ਨਰੀ ਦੀ ਦੁਕਾਨ ਕਰਦਾ ਰਜਤ ਖੁੱਲਰ ਨਾਮੀ ਨੌਜਵਾਨ ਵੱਡੀ ਠੱਗੀ ਹੋਣ ਤੋਂ ਵਾਲ਼–ਵਾਲ਼ ਬਚ ਗਿਆ।

ਉਸਨੇ ਦੱਸਿਆ ਕਿ ਉਸਨੂੰ ਇਕ ਫੋਨ ਆਇਆ ਜਿਸ ਵਿਚ ਫੋਨ ਕਰਤਾ ਨੇ ਕਿਹਾ ਕਿ ਮੈਂ ਸਮਰਾਲਾ ਦੀ ਫੌਜੀ ਕੈਨਟੀਨ ਤੋਂ ਬੋਲਦਾ ਹਾਂ ਸਾਨੂੰ ਕਾਪੀਆਂ ਅਤੇ ਪੈੱਨ ਚਾਹੀਦੇ ਹਨ। ਰਜਤ ਖੁੱਲਰ ਨੇ ਦੱਸਿਆ ਕਿ ਆਪਣਾ ਨਾਮ ਰਵੀ ਕੁਮਾਰ ਦੱਸਿਆ ਅਤੇ ਉਸਨੇ ਵਟਸਐੱਪ ਉਪਰ ਆਪਣਾ ਆਈ ਕਾਰਡ ਵੀ ਭੇਜਿਆ। ਆਈ ਕਾਰਡ ਦੇਖ ਕੇ ਸਾਨੂੰ ਯਕੀਨ ਹੋ ਗਿਆ ਅਤੇ ਸਾਡੇ ਵਿਚਕਾਰ ਕਾਪੀਆਂ ਕਿਤਾਬਾਂ ਦੀ 5400 ਰੁਪਏ ਦੀ ਡੀਲ ਹੋ ਗਈ।

ਫੋਨ ਕਰਨ ਵਾਲੇ ਨੇ ਇਕ ਸੌਂ ਰੁਪਏ ਆਨਲਾਈਨ ਪਾ ਕੇ ਚੈੱਕ ਕਰਨ ਲਈ ਕਿਹਾ ਤਾਂ ਜੋ ਉਹ ਬਾਕੀ ਦੀ ਰਕਮ ਤਸੱਲੀ ਨਾਲ ਭੇਜ ਸਕੇ। ਬਾਅਦ ਵਿਚ ਫੋਨ ਕਰਤਾ ਨੇ ਇਕ ਬੈਂਕ ਵੱਲੋਂ ਆਇਆ ਐਸਐਮਐਸ ਰਜਤ ਖੁੱਲਰ ਨੂੰ ਭੇਜ ਕੇ ਕਿਹਾ ਗਿਆ ਕਿ ਸਾਡੇ ਵੱਲੋਂ ਗਲਤੀ ਨਾਲ 54 ਸੌ ਰੁਪਏ ਦੀ ਥਾਂ 54 ਹਜ਼ਾਰ ਰੁਪਏ ਪੈ ਗਏ ਹਨ ਕ੍ਰਿਪਾ ਕਰਕੇ ਬਾਕੀ ਪੈਸੇ ਸਾਨੂੰ ਵਾਪਿਸ ਸੈਂਡ ਕਰ ਦਿਓ। ਰਜਤ ਖੁੱਲਰ ਨੇ ਦੱਸਿਆ ਕਿ ਉਸਨੇ ਦੇਖਿਆ ਕਿ ਉਸਦੇ ਅਕਾਊਂਟ ਵਿਚ ਕੋਈ ਪੈਸਾ ਨਹੀਂ ਆਇਆ ਸੀ।